موضوع: اتخلص من قلق ودوشة الامتحانات الإثنين ديسمبر 21, 2009 11:33 am
بصوا و انا بادور علي حاجة للقرف اللي انا فيه دا قرف الامتحانات طبعا ... لقيت التوبيك دا قلت اجيبه اهو تستفيدوا معايا عاوزين نشد حيلنا كدا و نفتح كتاب بدل ما نضيع
اسيبكم مع الموضوع بقي
××
قلق قلق قلق
أوعوا سيبوني أنا قلقان
ما حدش يندهلي ولا يكلمني عشان أنا قلقان
بقوللك ايه… دي أيام امتحانات وأنا قلقان
كل دي عبارات بنسمعها من نفسنا أو من غيرنا أيام الامتحانات… طلبة كتير جدا بيحسوا بالقلق الشديد أيام الامتحانات
لا شك القلق ليه أكتر من مصدر في الأيام الجميلة دي(ايام الامتحانات طبعا) لكن أنا المرة دي هتكلم عن مصدر واحد وهو من أكبر المصادر
أحب أقدم بمقدمة سريعة
السنة اللي فاتت والحمد لله على كل حال كنت بعيد السنة… أثناء إعادة السنة دي كنت تعبان نفسيا جدا جدا جدا عارفين ليه؟
في أثناء حالتي النفسية السيئة دي جربت طرق كتير في علاج الموضوع ده وبحثت كتير في الموضوع وسألت متخصصين وكل حاجة وكنت في كل علاج أكتشفه وأطبقه أقول خلاص أنا بقيت كويس وأقعد يومين تلاتة حالتي النفسية كويسة وبعدين أرجع تاني في الحالة إياها
يعني انت مازلت في حالتك دي؟ لأ والحمد لله
عارفين الموضوع ده اتحل ازاي؟
في أثناء الفترة دي اكتشفت إني أهملت التخطيط والخطط اللي أنا كنت عاملها.. علماء التخطيط بيقولوا إن الشخص اللي عنده رسالة وخطط أقل عرضة للاهتزازات النفسية والعصبية وده أنا لمسته بنفسي في التجربة اللي قولتلكم عليها
فلما أعلنت عن دورة التخطيط الأولى وبدأت أعد المادة بتاعت الدورة وقفت مع نفسي شوية وبدأت أعمل الخطط من أول وجديد… خططت كل حاجة تاني وبمجرد ما انتهيت من الخطط لقيت نفسي رجعت لحالتي الطبيعية والحمد لله
وهتكلم عن حاجة تخدمنا في فترة الامتحانات
التخطيط أو الخطط بتنقسم لتلات أنواع
1- خطط بعيدة المدى … من سنتين لآخر العمر 2- خطط متوسطة المدى … من شهر لسنة 3- خطط قصيرة المدى … يومية وأسبوعية وكده
صحيح ما كملتش كلامي أنا قولت بعد ما خططت من أول وجديد حالتي النفسية اتحسنت جدا والحمد لله لكن كان فيه تحدي تاعبني أوي وهو إني مش عارف أعمل حاجة خالص يعني مثلا أقعد أقرأ كتاب ألاقي نفسي بتقوللي: المذاكرة… الكلية… شوف نفسك أقعد على الكمبيوتر شوية ألاقي نفسي بتقوللي: المذاكرة… الكلية… شوف نفسك أي حاجة أعملها ألاقي نفسي بتقوللي: المذاكرة… الكلية… شوف نفسك
وهكذا كنت قرفان جدا الحقيقة مش عارف أعمل حاجة خالص لدرجة إني مش عارف أذاكر حتى……
كده الموضوع شكله هيطول
نكمل المرة الجاية أحسن ما تخافوش مش هطول عليكم إن شاء الله عشان دي حاجة خاصة بالامتحانات
موضوع: اتخلص من قلق ودوشة الامتحانات 
الإثنين ديسمبر 21, 2009 11:33 am
... لقيت التوبيك دا 
